Çöplemeler

Annaberdi AGABAÝEW

▶ ÇÖPLEMELER

Dañ atanda pasyrdaşyp oýanyp,
Guşlar ömür hakda söhbet açdylar.
Ilki obañ gojalaryn oýaryp,
Onsoñ uçdular...

* * *

"Gyzym, näme dakjak gumryñ adyna?" ~
Diýen badyma,
Gapymda uzak gün saz eden şol guş
Dymaýdy birden.
Saýramady soñ.
...Ejesiniñ dakan ady bardyñ oñ!..

* * *

Gadym suwlar akan bolýar,
Guwlar ganat kakan bolýar,
Göwün mydam bir ýaşynda:
Galan bolýar, çöken bolýar,
Käte asla gögermejek
Ýere arpa eken bolýar.

* * *

Ajy zat täkdendir, süýjüler ~ jübüt,
Süýjüler nesýedir, ajylar nagt.
Ajy bilen süýjä garlan küýlerim
Ähtimal, tersräkdir edil şu wagt,
A belki-de, dürsüräkdir edil şu wagt...
Galamym mesräpdir edil şu wagt.

* * *

"Telpek goýdum!" diýmek goýmakçy seri?
Ser goýdum! ~
Saýgardym maýadyr neri.
Lak atsa saña-da hem jyn, hem peri,
Senem saýgarsyñ-la Haýyry, şeri.

* * *

Mahal-mahal güman eýläp öýütmişim,
Mahal-mahal sözüñ berkin aýtmyşym,
Mahal-mahal añsam mamla däldigim,
Etmişime bermen
Halal gaýtmyşym!

* * *

Ýazyñ-güýzüñ durnasy,
Soñsuzdyr.
Parlak günüñ şuglasy
Ýoñsuzdyr.

Gul-gunçanyñ gyrawy
Gyrylmaz.
Ýürekleriñ alawy
Yrylmaz.

* * *

Gökden damja sary ýapraga ~
Dowul ýetdi jaýryk-jaýryk topraga.
Damjalar köpelip, şemal öwsende
Bir şänik ýaryldy ýeriñ göwsünde.
Bir şine göründi göründi ~ ýarsyp gitdi ýer,
Bir mañzy kemelip ~ sarsyp gitdi ýer.

* * *

Sile dönüp, derýa dönüp daşmasañ,
Hiç bolmanda dagdan inen dam-dam bol,
Gojamy sen, jahylmy sen, ýaşmy sen ~
Hemmw bilen hemdem bol.

* * *

Çamalagyn çaşyryp çal höwürtgäñ,
Ýel ýere gaçyrsa birin ýumurtgañ,
Ýapraklañ astynda ýaýdanyp durmañ ~
Ak baharyñ "ak badasyn" owurtlañ!

* * *

Bir gün... Şeýle bir uzak ol!
Hem şeýle gysga!
Bir günde müñ günüñ gülünden ysga!
Bir ýylda ~ ýüz ömür. Ýülz ýylda ~ biri...
Haýsysy nusga?!

* * *

Ýüzünden syrylyp ak ýüpek perde
Ýadygärlik açyldy ~
Jigläp gitdi garry enäñ ýüregi.
Jigläp gitdi,
aglap gitdi,
elendi...
Nirden aljak OÑA deregi?!

* * *

Basgançakdan basgançaga
ýörär ýere basan çaga.

* * *

Şahyrlar ýürekde Ýerem göterýär,
Şahyrlar ýürekde Günem göterýär,
Ömrüñizde eden günäñiz bolsa
Şahyrlar ýürekde onam göterýär.

* * *

Öz şaýyñ däl, başga şaýlyk,
Kisä düşse başagaýlyk.

* * *

Bir oba bar ~ ýüz şäherden owadan,
Bir şäher bar ~ owadan şol obadan.

* * *

Pul diýip sermenseñ, günde sermen-de,
Meñ kisämden eliñ çykar, şermende!

* * *

Bir görseñ şygyryñ ganym duşmany,
Bir görseñem onuñ söwer dosty men, ~
Sözüñden, özüñden tapmadym many,
Iki jähennemiñ owarrasy sen!

* * *

Şükür...
Şahyrlañ aýagnyñ astyn gazmadyñ ~
Ýazanny paýlaşdyñ Resul Gamzadyñ.

* * *

Çybynmydy, çirkeýmidi,
wazlaşyp,
Daşymy aldy-da uşajyk işler,
Bir-biriniñ öñne geçip, dazlaşyp,
Saldy-la aýagma duşajyk işler.

* * *

Demiñi sanandan hassahana-da,
Demin keslen ýagşy ussahanada.