08:58 Diñe Söýgi Hakda... | |
▶ GITDIM Gitdim, mümkin däldi galmagym, çünki Pidasydyk aýry şertleriñ, wagtyñ. Şol günde, Şol ýerde, Señ bilen galdy - Şatlygym, hyýallam, gijigen bagtym. Gowuşmagyñ rowa görülmeýşi deý, Aýralygam bizlik däldi, bu mälim. Bizi bir bedene baglan syrly bag, Señ duran ýeriñe bakdyrdy telim. A sen bolsa galyberdiñ çäresiz, Emma bakyşlaryñ diýýärdi "Gitme!" Ah, şol pursat tükenipdim, eý ykbal, Günäm näme? Bu ne agyr içikme?! Şol pursady unutmaryn hiç haçan, Hergiz gitme ýok keşbiñe dünýämden. Bile okan şygrymyzy, gör, indi, Sessiz aýdyp, köşeşýärin, diñýän men. Ýok, aýralyk däl bu! Düýşlerimde sen, Ömrüme gün goşýar tende janlygyñ. Men gitsemem, unutmarsyñ, mähriban, Aýanmydy sañ perişanlygym?!.. Gitdim, mümkin bordam galmagym, belki, Sen kalbymy duýan soñky hem ilki. ▶ BIR PURSATDA... Bir pursat ýeterlik şatlygyñ, bagtyñ, Gelip düýpden özgertmäge ykbaly. Höwrügersiñ şat heñlere sen göýä, Gussaly sazlarda ýok ýaly many. Hawa, onsoñ senem bagtlylar ýaly, Ýaşarsyñ, durmuşa artyp höwesiñ. Hem pikrin edersiñ nädip dolmagyñ, Geçen şo:ol adaty günleñ öwezin. ...Bir pursatda eýe bolunan bagtyñ, Sen bilmek islärsiñ serhedin, çägin. Emma bir pursatda ýitiren zatlañ, Aýt, nämüçin gözlemeýäñ sebäbin?!.. ▶ GARAŞARYN Giden gelýän bolsa göz dikseñ ýola, Garajak, gözlermi aýyrman bir dem. Hiç zat goýma, yşgymyzy aýara, Saña garaşmagy bes etsem, irsem. Dönüp bolsa pursatlara, gaýtadan, Suratlarmyz düşürjek däl elimden. Düşnüksiz ahwallar gelse ýeñseden, Bolup biljek däl ekeni çeniñ deñ. Juwanlygmyz dolap bilsek yzyna, Asla ýer bermäli pirime, ala. Bakmaýyn men seni gözläp ýyldyza, Hem soragmy jogapsyz goýan ýola... ▶ GELIPSIÑ MENI IDÄP... Gelipsiñ meni idäp, Bolupdyr halyñ bitap. Talanan kerwen deýin gugarypsyñ, eý aman. Kalbyń ýerden dilik, emma ýaşyrjak bolup, Örtýärsiñ eliñ bilen üstüni uly ýamañ. Diýýäñ: "Ozalky salgyń bolupdyr gury salgym, Kyn düşdümi garaşmak gelmez wysala ýokdan". Eý, ýalñyş ýerden gözlän, Dideleri ümezlän! Seret, indi gözlerim garaýar saña gökden. Rahat hem juda aýan seni arşdan synlamak, Ýok, men asla ýalñyz däl! Mydam gözlemde keşbiñ. Öz-özümden lowladym, hasrat çekişiñ görsem, Şatlanañda ýene-de öñkim ýaly köşeşdim. Ara daş boldugyça, ýakyndym saña has-da, Gaýgylarmy undardym, käte göge bakañda. Seni bagyşlamadym. Hiç bagyşlap bilmedim! Maña ýazan şygryñy ýat gözele okañda. Bilýäñmi, bu ahwala şaýat bulutlar şonda Ýagdy, ah... deñizde gämiler galdy azaşyp. Sen näme etdiñ?! Ozalky endigiñe görä, Gaçmadyñ, bagryña basdyñ, Gollaryñy giñ açyp. Hawa, sen öz bolşuñdan tapyp näzil teselli, Mañlaýñy örten saçy gañrardyñ yz-yzyna. A men bolsa şo pursat ilki göremdäki dek, Gaýtadan aşyk bordum, ýene saña ~ özüñe. Gelipsiñ bu gün idäp, hem kinw edýäñ biraz, Sensiz ötürenime niçe gündür aýymy. Indi özüñw bagly, isle ýazgar, isle söý, Aýt, men nädip küýsäýin, ýitirmedik zadymy?!.. ▶ AHWAL Dünýä imasala, öñki-öñkülik, Gije dañ egnine başyn goýanda, Dogýar Güneş täze umytlar bilen. Emma nämüçindir sebäbin gizläp, Kalbymda ýat dilli duýgular kileñ. Nämeden gapymy gulpladym diýip, Açyp gitmeler, Duýdansyz içimi çekmeler, Içgepletmeler. Ne beýle küýsemek?! Ýagyş suw-sil bolup, öpýär topragy, Bu wysala şaýat bolan baglaryñ Güýz gelmezden saralypdyr ýapragy. Höwürtgesin taşlanoklar guşlaram, Diñe men sygamok belli mekana. Bir tesellim ~ sebäpli uzyn gije. Käbämiñ gujagny dolduran göwräm Zerreçe ýok, Dünýäniñ goýnunda öwrülip hije. Sebäbine düşündim, Mahal-mahal özümi terk etmeleñ, Duýdansyz içimi çekmeleñ, Içgepletmeleñ. Ine, durun, Soñunda hakykat açdy huzuryn, Ah... dertli ekeni geñ yşkdan ruhum... 10.11.2017 ý, "ADALAT" gazeti. ◆ ◆ ◆ ▶ ÝÜREK ESERINI ÝAZAN SYÝANY Her gelen hasrata asla dözmedim Duýdurmadan has daşlaşdy aralyk. Kalba hemdem hatlaryñy gözledim Ýatyr olar ýapraklar deý saralyp. Wagt günlere hökümini ýöredip Kagyzyna ýetirse-de zyýany. Başarmandyr teýkaryndan mizedip Ýürek eserini ýazan syýany. Ýene-de ýalñyz men öñküler deýin Bilmeýän bu täleýime höwrügip. Nirede sen, haýsy takdyra boýun Ykbalymy ýalñyzlyga öwürip. ▶ EZIZIM, MEÑ ÜÇIN ŞYGYR ÝAZSANA Ezizim, meñ üçin şygyr ýazsana Ony özüñ oka gözlerme garap. Şygryñ bilen äkit meni bu ýerden Yşkyñ ummanyna, ýürege tarap. Ýelk ýasan hyýallae asla boýun däl Şowsuz ömri inkär edýär serimde. Az wagtlygam bolsa ýaşasym gelýär Inçw duýgularyñ dömýän ýerinde. Oka, men diñläýin özümden geçip Şemiñ tüme aşyk bolup ýanşy deý. Gussasyn bahara aýan buludyñ Bägülleriñ leblerine damşy deý. Galmaga rugsat et, ýürekde baky Isle doly, isle meni telbe saý. Gerek däl panynyñ köşgi-eýwany Razy, kalpan ýetse dyz eperlik paý. ▶ KIM BIZ? Ne söýgüli bolduk bagry badaşan Ne-de bir dost bolduk hyýallary bir. Jandan ýakynlygyñ, ýatdan daşlygyñ Sebäbin tapmadym Aýtsana, kim biz? Özgermedi hiç zat, öñki-öñkilik, Güneş dogýar sensiz geçmejek günde. "Şu iñ soñky" diýip goýan nokadym Täze şygryñ düýbün tutýar köñülde. Bir ömüre çökder gelen söýgimiz, Goýdy meni bärde, señ paýyñ añry. Şondan soñra ne-hä birleşip bilýäs Ýaşap hem bilmeýäs, özbaşdak aýry. Daşlaşdygyñ saýy artýar ezýetim Golaý gelseñ, çür depämde gözýetim... ▶ SYRLY ÇABGA Üstümizi basan duýdansyz çabga, Guýdy, öñküsi däl, bardy geñ haly. Hamana şondan soñ, şo günden soñra, Göýä bu ýerlere dönmejek ýaly. A biz bolsa pitiwa-da etmedik, Geñ ahwaly garşyladyk adaty. Çünki ýüregmizem pälimiz ýaly Juda sadady. Gaçmadyk, gaýta-ha gollarmyz ýaýyp Bagra basdyk rehmetini semanyñ. Seni derde goýsa ezilen saçlañ Meni bolsa hopukdyrdy jemalyñ. Sendedi ýollary söküp idänim Aýapdyr gözleñde özün gözellik. Gaşlaryñ, dodagyñ ajaýyp çyzlan Ýok olarda ne artyklyk, ne kemlik. ...Sowlup ýetişmänkäk penakär ýere, Üstümizi basan şol syrly çabga. (Gelmedi bir gezek, dolanmady hiç Oýlanýan, häzir ol, gör, nirde ýagýa). Şonda aýan eken oña ähli zat ~ Bu ýerlerden başyñ alyp gitjegiñ, Terk etjegiñ... ▶ NÄTANYŞ ÝAKYNYM Ýakyn tanyş däldik, asyl bir gezek Görmändik ýüzüni birek-biregiñ. Emma şu gün seni tanadym derhal Otyrkañ tirsegñe çala direnip. Gözleñde nämälim dünýäñ ataşy, Bilmen, garaýşyñda haýsy hazyna?! Öwrüldim heýkele duran ýerimde Ýa anym terk etdi, ýa doñdy syna. Nätanyş keşbinde gelen, ýakynym, Aýt, haçan, nirede ýitirdim seni?! Ýa men mätäçdimmi ýa sen gözlediñ, Bat ahyr her zadyñ öz çaky-çeni. Daşyñdan her näçe başga bolsañ-da Mähremi tanamak mümkin däl yşka. Emma tanap bilermikäñ sen meni ~ Sebäp dertlem küti, duýgulam ýuka. Ätmedim bir ädim bolsa-da ara Çözmänkäm uly bir soragy häli. (Kenara gowşanda güýçli tolkunyñ Bat bilen yzyna tesişi ýaly). ...Bir gün özüm tanadaryn, ýok bermen, Ruhuñ ynjamagna özge bedende. Gaýtadan ýygarys ylham lälesin Asman rehmet damjalarny seçende. 18.08.2017 ý, "EDEBIÝAT we SUNGAT" gazeti. ◆ ◆ ◆ ▶ MEÑKI BOL! Nirden nirä barýañ? Gury sowal bu. Hyýallarym däldir seniñ deý erkin. Sen ýolagçy bolsañ, düýnden ertire Sözle, aýak tozuñ öpen sepil kim?! Öz guran dünýäñe sygmadyk ruhuñ Nirede Watany?! Nirede ýerlär? "Gal!" diýmek manysyz synyñdan çekip, Gözlegiñ başgamy, Ýok, ýok, ol men däl. Emma nämüçindir dyzymda başyñ Günleñ alawyna duş gelen pilläm. Muny näçe duýdurmajak bolsañ-da, Sen juda üýtgeşik, Dözümsiz iññän. Sen maña asman deý uzakda, emma Kalbyñ zemin ýaly ýürekdeş, ýakyn. Söýeniñ bolsam-da, ýoly saýladyñ Onsoñ saklamaga ýok meniñ hakym. Señ giden ýoluña bakmaryn asla Atyp bilmen duýgularñy howsala. Garaşaryn goýup giden ýeriñde Bir gün meni sensizlikden kowsalar. Garaşaryn, gije düşer. Dogar Gün. Belki, güýzem geçer, geler gyş, bahar. A men bolsa bizi ezen şol çabga Sowal berip, senden alaryn habar. Çünki ol gizlemez menden hiç bir zat Eder sen hakynda bilýänin beýan. Ikimiziñ pynhan bolan syrymyz Şol çabga ~ bir şoña bolupdy aýan. ...Alyslar salgaýar golun, bolsun ýol, Dönäýseñ, goýberme elim, meñki bol. ▶ SEN GELDIÑ Aýdarmyñ kimligiñ gözlerme garap, Haýyş etsem, hiç günüñe goýmasam. Ataşa ymtylýan perwana deýin Pisint etmän nämäñ garaşýandygna Señ jogabyñ üçin ursam pelesañ. Tanamak zeruram bolmazdy eger Garaşan bolsadym kimdir birine. Swn hakynda bilmek islän zatlarmy Özümden, öz niýetimden gözlärdim, Emma geldiñ garaşmankam hiç kime. Jahankeşde diýsem, matlabyñ deñ däl, Derwüş diýsem, "hüw" çekenñi görmedim. Eý, sesi köñülden çykan bilbilim, Bir dillen, nämedi seni bu ýere Gelmeklige mejbur eden gözlegiñ. Ümsümlige werziş bolan dünýäme Görülmedik çabga bolup geldiñ sen, Depgini hiç nota gabat gelmeýän Juda näzik nagma bolup geldiñ sen, Ah... manysyz geçen günleñ soñuna Bozulmajak tagma goýup geldiñ sen. Göwnüme ähli zat özgeren ýaly, Ulaşdym ahwalna yşkyñ, heseriñ. Ýyllañ tizligine bat bersem ozal, Indi dileýärin yza teserin. Sen geldiñ, barlygyñ ömrüme many, Ýazmaga yşk hakda täze dessany... Gurbanjemal ANNAKOWA. "Edebiýat we sungat" gazeti, 09.03.2018 ý. Surat: Ilýa Repin / "Какой простор", 1903 | |
|
√ Perişan kalbyñ umydy / Goşgular - 01.01.2024 |
√ "Ulag gidip barýar..." / Goşgular - 28.04.2024 |
√ Ömrümiñ manysy bolmaly zenan / Goşgular - 05.02.2024 |
√ Tazy / Goşgular - 30.01.2024 |
√ Lenç edilen nakyl / Goşgular - 05.02.2024 |
√ Moskwadan görýärler / Goşgular - 30.01.2024 |
√ "Diýdiñ: Gelin bolup görkezeýinmi?.." / Goşgular - 14.02.2024 |
√ Gökdepäm / Goşgular - 22.03.2024 |
√ Sokrat / Goşgular - 16.05.2024 |
√ "At bilen kowalap gördüler ony..." / Goşgular - 01.01.2024 |
Teswirleriň ählisi: 1 | |
| |