Gözýaşlarym sümsüledir ömrüñe

GÖZÝAŞLARYM SÜMSÜLEDIR ÖMRÜŇE

Seniň sümsüläňe seredip siňe,
Irkilen bagtymyz pikire batdy.
...Geýen zatlaň görkdi görküň üstüne,
Ýaglyk daňyşyňam duran sungatdy.

Keýik owlagy deý gyz gopuşyňdan
Düldürän mejnundym, ýanýardym çeper.
Syrly gülümsiräp, göz gypyşyňdan
Dogumly aklyma ýetipdi zeper.

Gyz başyňa ýaraşardy gök ýaglyk,
Aýna bakyp düzedişiň eserdi.
Toýlarda säw tapyp, gyzlardan galyp,
Golaý gelip pyşyrdardyň heserli.

"Saňa gerek dälmi ýaşajyk gelin...?!" -
ýarymoýun, ýarymkine gürlärdiň.
Ýaglygyňy öýmä öwresiň gelip,
Şaý-sepleriň şyňňyrdysyn küýsärdiň.

Sen arzuw ederdiň azan aýdylsa,
Soň aglardyň başyň goýup egnime.
...Gözýaşlarmy dakyp gaýtdym gaýdamda,
Olar indi sümsüledir ömrüňe.

Seýitmyrat Geldiýew