Kyblam

KYBLAM

Dogulamda ele alyp, begenip,
Diýensiňiz: "Enaýyja, tokgaja..."
Ondan soňam ýadymda kän saparlar
Bolanlarym arkaňyza hopbaja.

Ýykylsam elimden tutup,
galdyryp,
Diýmezden ulaltdyň sözleň paýyşyn.
Çaga isleglermi tutup nazarda
Kemin goýman bitirerdiň haýyşym.

Kaka! Ýarym asyrdanam aşypdyr,
Ykbalyň kerweni, ömür möçberi.
Ýok, bu ýoluň soňy diýildigi däl,
Entek bile kän menziller geçmeli.

Manysy-da bolmaz sensiz ýaşaýşyň,
Gelmez durmuş ýollaryny aşasym.
Dilimde senadyr Hakdan dilegim:
"Bagtymyza kakam uzak ýaşasyn!"

Bergili men, bize sarplanyň üçin,
Şol ýarym asyry - ýel bolup şuwlan.
Indi galan ömrüňize el gatyp
Men ömrümi berjek!
Boljak men şuglaň!
KYBLAM!!!

Baky AMANÝAZOW.