Maýyplar öýünde sadaka berdim

MAÝYPLAR ÖÝÜNDE SADAKA BERDIM

Maýyplar öýünde sadaka berdim,
Jigerim daglandy, göwnüm bozuldy.
Olaryñ gözgyny halyny görüp,
Bagrym paralandy, ýürek ezildi.

Döräninde maýyp döräpdir olar,
Üstesine, ýetimlik hem goşulan.
Olaryñ hemmesi ynsan balasy,
Perzentleri biziñ ýaly kişileñ.

Synalarnyñ kemisdigi görnüp dur,
Mahrum eken kim aýakdan, kim elden.
Agyr durmuş üstlerine sürnüp dur,
Kim ýolun görenok, kim namut dilden.

Kimler eşitmekden - gulakdan mahrum,
Ömür ýaşamaly yşarat bilen.
Olaryñ ykbaly baglanan eken
Aýylganç, gabahat ahwalat bilen.

Şonda-da basylman ýaşap ýör olar,
Şeýle ýowuz durmuş geregi ýaly.
Adamzat kowmunyñ rehimdarlygyn,
Göýä ölçäp duran terezi ýaly.

Görenimde maýyp çagajyklary,
Ulagyma girip agladym - walla.
Ýaradanyñ dergähine arz etdim -
Bularyñ günäsi nämekä, Alla?

Setirlerimi okan eziz doganym,
Sözüm howaýy däl, bir baryp gör sen!
Gazanarsyñ ýüz müñ hajyñ sogabyn,
Ýetimler öýünde sadaka berseñ!

Didarberdi ALLABERDIÝEW.