Men

▶ MEN

Men—kör,
Meniň gözlerime seniň keşbiňi
Oýup çekipdirler,
Gözüm açsam didaryňy il görer,
Gözüm ýumsam—men.
Men—ker,
Bu dünýäniň gohy-galmagalyndan
Eşidýärin serwim diňe seň sesin.
Ýasynyny eşdişi deý jesediň...
Men—lal,
Meniň dilime
Daglap ýazypdyrlar seniň adyňy...
Men—güň
Azmy saňa ýüregimi berenim,
Azmy saňa ygtyýarym berenim,
Sen näme diýip aldyň meniň aňymy?..

* * *

Zöhre-Tahyr ýaly ikimiz gije,
Jöwher gylyç goýup ýatdyk arada.
Garşy goýar ýaly aýylganç güýje
Ata-baba kada derkar adama.

Gündiz-gijäň aralygy—säher deý
Ne huşda
         ne düýşde. Düşdük nä güne.
Bir aýňalsak, gylyç—ynanarmyň, heý,
Öwrülipdir gyzyl gan deý bägüle.

* * *

Ýene men bagladym al-elwan çemen,
Orun bermese-de penjiräň, serwim.
Seniň dal gerdeniň näze eýlenen
Meni örtemäge eljirän, serwim.

Men saňa jadyly nama ýolladym,
Gudrat bile gyz göwnüňi awlara.
Sen aýdyma göwnüň bermän bilmediň,
Aýdym döredeniň şindem awara.

Gör, nije wagt söýgim möwjedi meniň,
Gör, nije wagt dözdüm seniň jebriňe.
Bu gün haýran galýan mejnun edenim
Seniň beren takadyňa-sabryňa.

Nadylmy men,
                    dälmi,
                           barybir, seni
Şadyýan aýdymlam heýjana salar.
Hawa, deňziň ajandygyn satmaýar
Şor deňizden galan asal jalalar...

* * *

Entek,
          günä işi edenok entek,
Ýüregimden uzap gaýdan ellerim.
Olar diňe şygyr ýazyp sen hakda
Hem çeşme suwuny ýüze sylan dek
Ýüze çaýdy tolkun saçlaň tellerin,
Seniň melewşe deý näzik bedeniň
Ellerim bagryna basanda-da hut
Basandyr
             alawlap barýan ýürege,
Seni-de dem salym otlajak bolup...

* * *

Sorapsyň joraňdan meniň halymy,
O haly özüňde duýmaýan ýaly.
Görüpmidiň ýazda daşyp, däliräp
Güýzde ýatyp, şorap galan derýany?

Görüpmidiň arly ýyllar alawlap
Garda galyşyny ot ýanan ýeriň?
O haly özüňde duýmaýan ýaly...
Ýa-da sorap duýdurýarmyň, dilberim?!

Nobatguly REJEBOW