Nar

NAR

Gözel gyzyň dişleri deý,
Düzüm-düzüm düzülen nar.
Agramyna tänip ýere
Baldagyndan üzülen nar.

Suwundan ganyp Sumbaryň
Eçilipsiň miwäň baryn.
Duşuşanda söwer ýaryň
Ýaňagy deý gyzaran nar.

Şerbetiňden içsem gana,
Lezzetiň kän şirin jana.
Ekipdir bir akly dana
Waspyň näçe ýazylan nar.

Dag şemaly sypap ýüzüň,
Çalar şirin mukam-sazyň.
Gelerne garaşyp güýzüň
Misli ýar deý bezenen nar.