Sadranç

Annaberdi AGABAÝEW

▶ SADRANÇ

Saýn-Şandyñ muzeýinde çöpleri haýwan, ynsan şekilinde bürünçden guýlan gadym mongol küşdi saklanýar.

Ynha, bürünç Neýon münüp tagtyna,
Dymyp göz aýlaýar bürünç leşgere:
"Mundan sürsem goñşy hanyñ üstüne,
Basarmykam,
Ýa bormukam masgara?"

Aýagnyñ astynda ýatan köpekler
Birden gymyldadyp bürünç dillerin,
Diýýär: - Bejit perman kylgaý, jenabym,
Gemireli süñkün uzak illeriñ! ~

Şirleren penjesin göterip göge,
Her ýan bulaýlaýar inçe guýrugyn:
- Gopbam hany para-para kylar biz,
Bergil tizden, hökmürowan buýrugyñ! ~

Goýunlar mölerdip bürünç gözlerin,
- Pähim edip görüñ! - diýýär serdara. -
Çozmaly! Sebäbi neneñ çozmajak,
Biz ak, olañ bolsa barysy gara! ~

...Diñe birje hatar, diñe öñ hatar,
Daýaw pyýadalañ egindeş sapy ~
Goýun çopan,
düýe çopan,
atbakar
Dymyp dur oñlaman aýdylýan gepi.
Bürünç Neýon
Napoleon deý bolup,
Bürünç tagtdan berýär ýowuz permanyn:
- Öñe, çopanlarym!
- Öñe, köpeklem,
Äkeliñ kellesin maña şol hanyñ!

Köpekler garpyşyp, şirler towsuşyp,
Goýunlar çolaşyp aýak astynda,
Altmyş dört öýjügiñ içinde däl-de,
Ganlar akýar gadym Gobiñ üstünde!..

Ganlar akýar baýyrlardan, düzlerden,
Öñdäki hataryñ ~ pyýadañ gany.
Eneler "dat!" diýip, çokunýar Budda,
Sährada köpelýär buddalañ sany...

...Ähli buddalardan uzak señ ömrüñ,
Gadymy sadranjyñ kiçijik çöpi, ~
Ölmez-ýitmez pyýadalar hatary,
Dünýäñ şasy Ýeñiýoluklañ Sapy!