Säher ukysynda..

Säher ukusynda...

Säher ukusynda ýatyrsyň,
läläm,
Sähel açyk penjirede
gözenek.
Şöhle seň ýüzüňde tans edýär sessiz,
Seni oýarmaga asla dözenok.

Sen bolsa ýatyrsyň
assa dem alyp,
Seniň keşbiň asudalyk nusgasy.
Şu pursat ýüzüňe bakan betbagt
Unudar derdini,
ýiter gussasy.

Balyndan ýarylan gyzyl nar ýaly
Bol hyjuwdan çyzylypdyr dodaklar.
Bakylykdan nyşan ýaly görünýär
Gara kirpiklerden gezelen oklar.

Gaşyň ganat kakyp barýan garlawaç,
Saçlaň depeleri goraýan mardyr.
Özüm bolsam gowy,
birden bolmasam,
Seň nazaryň düşjek bir bagt-la bardyr.

Wah,
näme beý diýdim
öz dilim bilen,
Meniň aýdanymy ýalňyş ýormagyn!
Bar bolan aklymyň üstüni örtdi
Sähelçe serpilen ýuka ýorganyň...

Orazguly ANNAÝEW