Sen nädip het etdiñ?

SEN NÄDIP HET ETDIŇ?!

Sen nädip het etdiň, nädip kast etdiň,
Özüňi, ömrüňi dözüp kesekä?!
Men şonda-da söýdim, ýazdym, wasp etdim,
Örtenen süňňümi öwrüp kesewä.

Neneň rowa gördüň?
Bagt güme gitsin,
Sen gaýdyp dolanma ýalandan-çyndan.
Ah, men ozal bir hoşniýet ýigitdim,
Indi rahatlygy soraýan jyndan.

Hawa, melekden däl,
peläket jyndan,
Ondan maňa sen hakda küý geçipdir.
Palta saldyň köňlüň iki ujyndan,
Ozon perdäm, dowzah yşym açykdyr.

Ok deý sözleň parran geçdi ruhumdan,
Maýyp ruhum kyýamata ýararmy?
Süýegim, siňirim galkynmaz gumdan,
Dogalar bitirmez köňül ýaramy.

Ömrüň jogap tapmaz, aýlanmaz diliň,
Duýgularňy yşk törpüsi ýülmändir.
Ruhuňda yzlary galar edeniň,
Kast edişiň Hudaý ýagşy bilýändir.