Seniñ yşkyñda

SENIŇ YŞKYŇDA 

Özge daragtlaryň miweläp bary,
Gül döken çagynda enar gülledi.
(Ybraýym Ýusup, garagalpak şahyry).

Enarlar ýetişdi seniň yşkyňda. 
Gülap gaýmaklaşdy seniň yşkyňda. 
Tümmül ýaňagyna,
Güller şähdine 
Perwanalar düşdi seniň yşkyňda.

Aý-aýy çalyşdy seniň yşkyňda,
Pasyllar tirkeşdi seniň yşkyňda.
Ýad ülkeden gelen,
Durnalar, guşlar 
Ganat ýaýyp uçdy seniň yşkyňda.

Olar hoşlaşdylar günüň yşkynda,
Men el bulap galdym seniň yşkyňda.
Bir zat sargajakdym ýuwdunyp galdym!
Giň asmana düşüp gözüm-görejim 
Bir görsem gamaşdy seniň yşkyňda. 

Bir zat sargajakdym 
seniň yşkyňda,
Ol zat seň saraýyň
Ýa–da salgyňmy?
Ýa ýuwuz ýyllarda
Senden aýyran
Zalym aýaralykdan 
Galan algymmy?

Bir zat sargajakdym, galdym ýuwdunyp.
Käte adam dillenmeýär 
Ýaýdanyp.
Ýelmaýama ýükläp tapan-tupanym,
Ýürek sarwanymy
Günükdirjekdim.
Ah! Salgyma duşdy seniň yşkyňda.

■ DILLENDIŇ

Dillendiň 
Uzak yýllaryň agysyn 
Nalasyn dillendiň 
Gözleriňden gaçdy hyjran düwmesi
Indi maňa galan  
Soňky dertleň duýmasy
Gözleriňden gaçdy hyjran düwmwsi
Emma bir damjasam 
Ýere dammady 
Nemli düwmeleriň 
Gerşime damdy

Sen agladyň 
Uzak–uazak  yýllaryň agysyn 
Onsoň 
              Irkildiň...
Meni bolsa 
käte hiç ýatyrmaýar 
Ýürek horkuldym.

Gapur HOJA.