Ýadyñdamy?

ÝADYÑDAMY?

Baharyň bir güni ilkinji gezek
Dideler kaklyşan ýol ýadyňdamy?
Ornundan çykaýjak bolanda ýürek,
Sözleri uýaldan hal ýadyňdamy?

Kän arzuwlap, bagty düýşe girizip,
Tolgunmalaň gujagynda birigip,
Dideler çaknyşsa iniň düýrügip,
Gözlerde atylan pal ýadyňdamy?

Sözleri däl, içgin diňläp her demi,
Otly bakyşlardan tapyp melhemi,
...Bu ýoluň garaňky görnende soňy,
Gözüňden syrygan öl ýadyňdamy?

Barmak basyp "Umyt" atly syýama,
Keşbiň hemişelik çekdim hyýala..
Diýipdik biz: " Böwet bolmaz bu ýola
Bir-birinden parhly sal", ýadyňdamy?

Diň salsak ýa salmasak çep gursaga,
Duşarysmy ýollaň mundan gowsuna?
Ahyr bir gün "näm bolsa, şol bolsuna"
Söz beripdik, eýsem, şol ýadyňdamy?

Agageldi ITALMAZOW.