Ýaşlyk ýatlamasy

ÝAŞLYK ÝATLAMASY

Howlymyzda bir tut agajy bardy,
Şahasyna guşlar gelip saýrardy,
Saýraşyp guşlaryñ uçuşy ýaly,
Günleñ kerwen gurap geçişi ýaly,
Şol tut ýylba-ýyldan ösýärdi ýaýrap,
Ýaz aýy üstünden düşmezdik oýnap.
Goñşy çagalaram gelerdi ylgap,
Soñ üýşerdi oña bütin obamyz,
Şowhunlydy, hezillikdi howlymyz.

Her säher kişñärdi dor bedew atym,
Howlymyz gorardy alabaý itim,
Hersi bir tarapyn bezärdi tuduñ.
Saýasyna ýazyp türkmen halysyn,
Gaçyryp üstüne tuduñ dänesin,
Ejem çöpläp goñşulara paýlardy,
Ýüzärlij tütedip, tuduñ astynda,
Soñ howlynyñ dört künjüne aýlardy.

Şeýle hezil geçdi çagalyk döwrüm,
Ýene dolansady, etsedi öwrüm,
Düýn ýalydy, şahalarda oýnanym,
Düýn ýalydy, tudanadan doýýanym,
Ondan bäri ençeme ýyl geçipdir,
Arada aýlandym eziz obama,
Tüweleme, obamyzam ösüpdir.

Howlymyzyñ giñ törüni bezeýän,
Men şol tutda çagalygmy görýärdim,
Deñ-duşlarym bilen üýşüp bileje,
Saýasynda üçem aşyk oýnardym,
Atam onuñ yrýa etmän çybygnam,
Ýygnapdyr baryny, bolup hossary,
"Oglum, ine, şol tutdan ýasadym" diýip,
Maña sowgat berdi gazma dutary.

Şol gojaman tutdan meniñ dutarym,
Ele alyp, her dem kakamda taryn,
Men özüme oglanjykdyr öýdýärin.
Atamdan ýadygär şu dutar bilen,
Niçe ýyldyr wesýetiñe eýerip,
Şirwan perdä basyp, şirin saz çalyp,
Ajap-ajap aýdymlary aýdýaryn.

Kakajan TÜÝLIÝEW,
borçnama boýunça harby gullugyñ starşinasy.