ALATAW
Belent başyñ mydam gar
Etekleriñ çemenzar.
Salam saña, Alataw!
Sende müñ gül ysy bar,
Kert kemerli Alataw,
Salkyn serli Alataw.
Daglaryñ seresi sen,
Müñ bulak dereli sen,
Baş egýärin men saña
Jeýhunyñ enesi sen.
Mähribanym, Alataw.
Öz mekanym Alataw.
Syzyp damarlaryñdan,
Towsup kemerleriñden
Müñ bir bulak ugr alýar,
Týan-Şan seniñ seriñden,
Bereketli Alataw,
Hereketli Alataw.
Uçup düşdüm özüñe,
Ter çemenli ýazyña.
Dört müñ metr depäñde
Duşdum çopan gyzyña.
Gahrymanly Alataw.
Hoş zamanly Alataw.
Boýdaş eglen bir zaman,
Göwne geldi bir güman,
Hol baýyrlañ ýüzünde
Bulutmy ol, ýa duman?
Janly eken Alataw.
Şanly eken Alataw.
ㅡ Bulut nirde? Maldyr ol.
Dowardyr, gylýaldyr ol
Derýalardan akýan hem
Gaýmak, gymyz, çaldyr ol.
Sahy göwün Alataw.
Joşýar bu gün Alataw.
Týan-Şan, işiñ oñupdyr,
Mertleñ işi ýeñipdir.
Ak galpak gyrgyzlaryñ
Mähri saña siñipdir.
Sen wepaly Alataw.
Hoş sapaly Alataw.
Towşan ESENOWA.
