Gahrymanyň gelni

GAHRYMANYÑ GELNI

On barmagnyň yzy halyda bitdi,
Nikasy telpege gyýylan gelin.
Söweşe gideniň sarpasyn tutdy,
Nikasy telpege gyýylan gelin.

Gadam ursa galdyrmazdy başyny,
Hiç bakmazdy töweregini-daşyny,
Haly dokap dolandyrdy işini,
Nikasy telpege gyýylan gelin,

Watan üçin gitdi, söýüp besläni,
Gözel gyzyň göwnündäki isläni,
Gülüň gül-gunçasy, bagyň bossany,
Nikasy telpege gyýylan gelin.

Gaýyn öýde, atasy öýde sermendi,
Altmyş ýyl garaşdy, emma armandy.
Ahyr bir gün, gara ýere duwlandy.
Nikasy telpege gyýylan gelin.

Aýtokar SEÝDALYÝEWA.