GELDI
Eý dostlarym, şanly dessan döredi,
Bir goçak gahryman boldy-da geldi.
Ýowuz günde Görogly dek meýdanda,
Legendar gylyjyn çaldy-da geldi.
Ady Gurban* ㅡ ýigitlere başdyr ol,
Halkyma guwançdyr, köñle hoşdur ol,
Faşistleriñ gözlerine ýaşdyr ol,
Ganhorlañ tüplerin bozdy-da geldi.
Duşmana azm edip ýöredi her gün,
Gören duşman boldy ondan sernegun,**
Ganymyñ gursagna basyp ot dügün,
Şöhratyn äleme ýaýdy-da geldi.
Ýagyny görende, galdy üzeññä,
Çaldy gylyç, naýza urdy berzeññä,
Ýoldaşyna: ''Sen dur ㅡ diýip ㅡ gezegñe!''
Täk özi ençesin gyrdy-da geldi.
Ar alanda arslan kimin arlady,
Ganym gany gylyjyndan şarlady,
Altyn Ýyldyz sol döşünde parlady,
Üstünden ordenin dakdy-da geldi.
1941.
■ PERMAN GELDI
1.
Günbatardan göterlip,
Zulmaty duman geldi.
Zulum ojagyn ölçerip,
Pälleri ýaman geldi.
Süýşdügiçe bat aldy,
Moskwa ýetmän ot aldy,
Bir masgara at aldy,
Atlary çaman geldi.
Dary görüp aç jüýje,
Ketekden bosdy gije,
Emeli çykdy hije,
Iýmiti saman geldi.
Umyt etdi bu ülkä,
Özün dönderip tilkä,
Ahyry galyp gülkä,
Islegsiz myhman geldi.
2.
Duman gitdi, çykdy Gün,
Ýagtyldy jahan bu gün,
Haýyna salyp dügün,
Dertlere derman geldi.
Paýyn aldy banditler,
Suw gördi guduz itler,
Awa giden ol Gitler,
Diýmersiñ ㅡ ''aman geldi''.
Gylyçlap, at bökdürip,
Duşman bendin sökdürip,
Gyzyl baýdak dikdirip,
Ol ähdi-peýman geldi.
Gökde awuny awlan,
Ýerde nurbatyn towlan,
Faşizmiñ kökün köwlän,
Ol beýik perman geldi.
1942
Ahmet AHUNDOW-GÜRGENLI.
_______________________________
* Türkmenistan Sowet Soýuzynyñ Gahrymany Gurban Durdy.
** Sernegun - ýykyldy diýen manyda.
