Güýz söýgüsi

GÜÝZ SÖÝGÜSI

Güýz.
Çigrekli howa.
Şäheriň çeti.
Gözýetimde gün gizlenjek-gizlenjek.
Sary saman örten baýryň üstünde
Otyrys biz, ikimize bir penjek.

Aýdyma hiňlenýäň gyz göwni hakda,
Ýakymly sesiň bar, men gulak asýan.
Sary saman örten baýryň üstünde
Otyrys biz, ikimize bir asman.

Mähribanlyk, bar zat gülala-güllük,
Bizden daşda ýowuz aýralyk-gaýgy.
Sary saman örten baýryň üstünde
Otyrys biz, ikimize bir söýgi.

Hemra ŞIROW.