Henizem

HENIZEM

Tamakin däl gapymdan seretmäge,
Gapymyň kiltigin oýnaklamaga.

Söýem barmak bilen penjiräme kak,
Akyp barýan köçelerden maňa bak.

Henizem obamyň däli gyzy men,
Asyrlaň ýitiren köne yzy men.

Henizem ýelleriň ganaty meňki,
Kyssada çapylýan ak aty meňki.

Gözüm ýyldyz, agzym täze dogan aý,
Garyplyk çaglardan, göwnüm bolsa baý.

Gabagymyň astynda deňiz ýaşaýar,
Gözellik şährimde semiz ýaşaýar.

Saçymyň içinden aryklar akýar,
Daglary tenim bilen bile boý çekýär.

Gysgajyk gülki, men ýoka dodakda,
Azajyk selki men, adak - çadakda.

Asmanyma aý gysdyryp gün çekýän,
Täze dünýäni düzüp könäni sökýän.

Aglap dogan goşgy maňa meňzeýär,
Sygman syzan goşgy maňa meňzeýär.

Goşgyň hudaýy men, behişt dogurýan,
Dünýäň panarynyň odun degirýän.

Akbibi BESIM,
Türkmensähra.

هنیزم

طاماکین دأل غاپئمدان سراِتمأگه
غاپئمئنگ کیلتیگین اۇیناقلاماغا

سؤیم بارماق بیلن پنجیرأمه قاق
آقئپ باریان کؤچه‌لردن مانگا باق

هنیزم اۇبامئنگ دألی غئزئ من
عاصئرلانگ ییتیرین کؤنه ائزئ من

هنیزم یل‌لرینگ غاناتئ منگکی
قئصصادا چاپئلیان آق آتئ منگکی

گؤزۆم یئلدئز، آغزئم تأزه دۇغان آی
غارئپلئق چاغ‌لاردان، گؤونۆم بۇلسا بای

غابئغمئنگ آستئندا دنگیز یاشایار
گؤزللیک شهریمده سمیز یاشایار

ساچئمئنگ ایچیندن آرئق‌لار آقیار
داغ‌لارئ تنیم بیلن بیله بۇی چکیأر

غئسغاجئق گۆلکی، من یوقا دۇداقدا
آزاجئق سِلکی من، آداق-چاداقدا

آسمانئما آی غئسدئرئپ گۆن چکیأن
تأزه دۆنیأنی دۆزۆپ کؤنأنی سؤکیأن

آغلاپ دۇغان غۇشغئ مانگا منگزه‌یأر
سئغمان سئزان غوشغئ مانگا منگزه‌یأر

غۇشغئنگ حودایئ من، بهیشت دۇغوریان
دۆنیأنگ پانارئنئنگ اۇدون دگیریأن

آق‌بی‌بی بسیم