Omar Haýýamdan rubagylar

OMAR HAÝÝAMDAN RUBAGYLAR

Dünýäden gorkýa diýp pikr etme bijaý,
Ölümden gorkym ýok, ondan göwnüm jaý,
Ölmek hakykatdyr, men ondan gorkman,
Güzeran pes bolsa, şol günüme waý!

***

Eger-de uzatsam zülpüňe elim,
Çyn aşyk bolmasam, kesilsin dilim,
Zülpünde görüp men däli göwnümi,
Öz ýesir göwnüme uzatdym golum.

***

Meý içip, göwnümiz gel, şat edeliň,
Gelerden-geçerden kem ýat edeliň,
Gam laýyna batan bu ýesir göwni
Akyl duzagyndan azat edeliň.

***

Gülüň möwsümidir, baga gideliň,
Şerigata garşy bir iş edeliň,
Gül ýaňakly ýarlar bilen şerapdan
Göklügi gülzara öwrüp gaýdalyň.

***

Söýgülim, haýsy el ýaratdy seni?
Görküň utandyrdy aý şöhlesini,
Gözeller baýram diýp ýüzün bezese,
Sen ýüzüň husnundan bezeýäň ony.

***

Sopulyk ylmyndan gaçan ýagşydyr,
Bir ýaryň bilini guçan ýagşydyr,
Dünýä ganymyzy içmezden ozal,
Üzümiň ganyny içen ýagşydyr.