Главная » 2023 » Sentýabr » 22 » Pyraga
23:59

Pyraga

PYRAGA

Beýik pirim, eý, Pyragym,
Seniň otly pyganyň bar!
Öçmezdir şöhrat çyragyň –
Arşa degen dessanyň bar.

Adyň siňdi bakylyga,
Sözüň döndi nakyllara;
Jünbüş berip akyllara,
Kalba salýan lerzanyň bar.

Aýra düşdüň sen ataňdan,
Çowdur handan, Aldyllaňdan;
Nala kylypsyň hijrandan ‒
Şygyrlarda girýanyň bar.

Aýryldyň gunça gülüňden,
Meňli gyzyň gül ýüzünden;
Gahba pelegiň jebrinden
Köýen kalpda armanyň bar.

Emma laýa batman göwnüň,
Il-halka bagş etdiň ömrüň.
Saňa nazar salmyş Taňrym –
Arşdan medet bereniň bar.

Ser salyp Arşyň kemerne,
Diň salyp Ýeriň damarna,
Aň salyp dünýäň çygryna,
Sapar kylan seýranyň bar.

Ferdöwsi, Attar, Jamy dek,
Jelaleddin Rumy dek,
Nowaýy dek, Nyzamy dek
Ägirtlerden ýaranyň bar.

Ýüz öwürmän azap-rençden,
Döredipsiň diňe gençden;
Guşgursak, dokmaňyz çäçden
Sap tyllaýy harmanyň bar.

Her sözüňi bir köşekli
Düýä deňlär türkmen kökli;
Üsti lagly-merjen ýükli
Jöwahyrly kerweniň bar.

Çyn göwher galar güýjünde,
Könelmez müň ýyl geçende;
Bu dünýäniň çar künjünde
Seniň müňläp haýranyň bar,

Her kelamyň nusga deýin,
Zyban goýduň asal deýin;
Minnetdardyr nesilleriň ‒
Kalplar içre mekanyň bar!
Goşgular
Категория: Goşgular | Просмотров: 352 | Добавил: yaran_yagmur_9 | Теги: Ýaran Ýagmyr | Рейтинг: 5.0/1
Awtoryň başga makalalary

Goşgular bölümiň başga makalalary

√ Bir dem ol dilber jemalyndan yrak olmak ne güýç... / Goşgular - 01.01.2025
√ Aramyzdan gidenleri ýatlalyñ! / Goşgular - 12.01.2025
√ Ýa Biribar / Goşgular - 30.01.2025
√ Söýlemezlik harjysy söýlemegiň hasydyr... / Goşgular - 04.01.2025
√ Men bir ýola... / Goşgular - 12.01.2025
√ Dil pyrak odunda ýandy, galdy jan hijran era... / Goşgular - 12.01.2025
√ Lolular / Goşgular - 08.01.2025
√ Kowusnama: Bedew edinmek hakynda / Goşgular - 12.01.2025
√ Bu köňlüm zowrakyn aldy bu gün bir gunça leb gülruh... / Goşgular - 06.01.2025
√ Oňşuksyz öý / Goşgular - 12.01.2025

Teswirleriň ählisi: 4
0
1 Garayolly25  
1449
Beýik Pyraga selle däl~de, ozalky baş geými ýaraşýardy.

0
2 yaran_yagmur_9  
1578
Howa, ýöne öňküsi ýatyş telpeklidi, ony bolsa hemme ýerde geýmeýärler

0
3 Garayolly25  
1449
Olam dogry, ýöne, çagalykdan bäri ozalka öwrenişensoň selle "ýaat" ýaly bolup dur.

0
4 yaran_yagmur_9  
1578
Eger rugsat berlen bolsa, Aýhan Hajyýew hem, meniň pikirimçe, ony ilkibaşdan selleli çekerdi. Dogry, selle türkmeniň milli eşigi däl, emma molla ogly molla bolup, selläni Magtymguly geýmän kim geýsin? Ony aýtsaň, Magtymgulam mydama selleli gezýän mollalardan däl bolan bolsa gerek, sebäbi mollaçylygy okap pata alany bilenem ol rysgalyny mollaçylykdan gözlemändir. Zergär hökmünde senetçilikden çörek iýipdir.

Howa, A.Hajyýewiň Magtymgulysy ençeme ýyllaryň dowamynda okuw kitaplarynda we öýleriň dullarynda ymykly ornaşyp, stereotipe öwrülmäge ýetişdi. A.Hajyýewiň beýleki kartinalarynda-da ol pikirli we hasratly keşbi bilen öz edebi mirasyna gowy laýyk gelýärdi. Şahyryň keşbinde A.Hajyýewiň ol ýerleriň ilatynyň tipiki ýüz keşbiniň aýratynlyklaryny hem gowy öwrenendigi görünýär (Bu arada, nesilleriniň aýtmagyna görä, şahyr tipiki şar gara saç-sakgally däl-de, biraz saryýagyz bolan). Bir kemçiligi - A.Hajyýewiň Magtymgulysy medresede-de, iş başynda-da, uly märekede-de, ýolagçylykda-da ýatyş telpeginde "gezer ýörerdi". Gyzylbaşlarda ýesirlikde kellesi şonly duruşy düşnükli: ýatyrka gapyl basylýar.

Emma onuň hortaňlygy, hasratly, ünjüli keşbi, meniň pikirimçe, kemçilik däldi. Çünki diýlende, umuman, Magtymguly "hasratyň şahyry", "hasratyň aýdymçysy" diýilýänlerden.

Emma soň, şahyryň hortaň we gussaly keşbini ruhupeslik hasaplap, bu stereotipi üýtgedip, ony selleli we haýbatly şekillendirmek tabşyrylandan soň basym onuň şeýle heýkeli peýda bolupdy. Ol heýkeliň heýkeltaraşlygyň dünýä nusgalaryndan "karz alnan" ýerleri kän (men onuň paýtagtdaky sary kitap stoljykly heýkelini göz öňünde tutýaryn). Onuň ýüzi we pozasy maňa bada-bat rus suratkeşi W.Surikowyň "Утро стрелецкой казни" kartinasyndaky Pýotr patyşanyň keşbini ýatlatdy. "Haýbatly bolmaly" diýlensoň, belki, şoňa ýüzlenendirler, jeza geçirip duran Pýotr patyşadan haýbatly kim bar? Ýöne Pýotr at üstünden aşak bakýar, täze Magtymguly gyýa bakýardy. Onçasyny bilmedim, heýkeltaraşlar biri-birinden köp zat "karz alýarlar", her ýerden birazajyk alynýar öýdýän.

Umuman, selleli Magtymgulynyň heýkeli ýaşy durugşan Görogla has laýyk gelýän bolsa gerek, umuman, olaryň käbir heýkelleri biri-birine örän meňzeş. Elbetde, Göroglynyň göwresi has ykjam we atletik, emma ikisiniňem ýüz keşbi haýbatly we ýowuz.

Elbetde, suratyny çekeniňde, Magtymgulyny häzirem öňküsi ýaly hortaň, gözleri hasratdan doly şekillendirseň bolar. Ýatyş telpejigini hem geýdirseň bolar, ýöne märekede wagyz edýärkä beri selle ýa-da çynlakaýrak telpek geýdirilse ýagşy.

Teswiri diňe saýta agza bolan ulanjylar goşup bilýär.
[ Agza bol | Saýta gir ]