Pyşbaga bilen içýan

PYŞBAGA BILEN IÇÝAN

Bir pyşbaga bilen bir sary içýan
Äht edişip, dost boluşyp jana-jan,
Günleriň bir güni ýola çykanmyş,
Ikisi-de kemerlerin dakanmyş.
Ýolda içýan diýen aýnadyp dilin:
"Dostum, men oýlanyp görýärin welin,
Ýokdur saňa menden ýakyn, mähriban,
Biz ikimiz göýä bir tende bir jan!"
Şo pille hem öňden bir ýap çykypdyr,
Içýan aljyrapdyr, herýan bakypdyr.
Pyşbaga dostuna diýipdir: "Şepe,
Näme üçin birden sen bolduň hapa?"
Içýan diýen: "Ýok, meň ýüzmek adatym,
ÖZüň bilýäň, gumda gezmek adatym."
Dosty diýen: "Gam iýme-de mün meni,
Suwdan sag-amanja geçirin seni!"
Dostuny hopba edip, boýnuny sozup,
Pyşbaga başlapdyr tolkunda ýüzüp.
Ýolda içýan dostun ençe çakypdyr,
Zäherini aýamazdan döküpdir.
Pyşbaga diýipdir: "Niýetiň ýaman,
Gaýtsaň päliňden, başyň bor aman.
Dost diýip, duşmanyň etme sen işin,
Oýlan, birden gözden akmasyn ýaşyň."
Içýan diýen: "Şu boluşym besdir, bes,
Kişi wesýetine edemok höwes!"
Pyşbaga dostuna nägile bakyp,
Bir çümüpdir. Içýan gidipdir akyp.

* * *

Kim duşmandan tutsa ülpet,
Öz başyna geler külpet!

1914 ý.

Hamza HEKIMZADA.

Terjime eden G.GURBANSÄHEDOW.

"Edebiýat we sungat" gazeti, 1961 ý.