Tüweleý

TÜWELEÝ

Sen eý, tüweleý,
Ýel girdaby,
Hyýalym, ýatlamalarym,
Sowruldy bary.
Ýatladyp sendäki çöp-çalamlary,
Gara ýel, apy tupan, syrgynmy, epgek,
Deñizleri towusdyryp, çägeleri göçüren,
Kalplary salan howsala,
Olary ýeldirgeden
Ýellerden.
Dörediñ towlanyp-towlanyp,
Ömrümizi sowuran, ruhumyzy öçüren
Ýeller
Seni öñüne salyp geler.
Eý tüweleý.

Ýüreklere ýel berdik, harasat gopdy,
Ekenimizi orjagymyzy bilmedikmi biz ýogsa?
Öýkelere ýol berdik, parasat hopdy.
Ýerine sen dörediñ.
Eý tüweleý, düşünjeler girdaby.
Seçdiñ dänelerimizi, harmany dördüñ.
Buşluklary boşluklara,
Senalary günälere, garyp,
Ne bähbit gördüñ.
Çala göründigiñ,
Bir-birege uzan eller
Terse towlandy.
Sen bilen geldi ýeller,
Hatda
Süýji jedel çekişmämiz
Çar ýana çekelenip
Asmanda nirädir duwlandy.
Özümiz gitdik pytyrap.
Gündogar, günbatar, ileri, gaýra,
Köñlümiziñ jümmüşinde şeýtan garaýar.
Añymyzyñ çür başy hile-al üçinmi merkez,
Ruhumyzyñ girdaby,
Towlanma, şuwlama, kes sesiñi, kes,
Garaş-eý, Garaş-eý,
Gargyş-eý saña, eý tüweleý.

Hüdaýi JAN.

Terjime eden Ylýas AMANGELDI.