Ýagyş

ÝAGYŞ

Dokuz melegi gezipsiň,
Ak ýagşym, melek nagmasy.
Ýeriň bykynyn ezipsiň,
Gögüň dertli dogmasy.

Alkymynda suwly salmaň,
Çynar, tallar sülmüräpdir.
Ysgyny, mejaly galman
Zeminiň haly harapdyr.

Barýan, dem dürsäp ýadasam,
Durasym-a gelenok teý.
Boýnunda betbagt kädisi,
Ýola düşen galandar deý.

Älem içre çapalaýaň,
Nara saly zybanymy.
Köne ýaram köwçeleýäň,
Yşka berip pyganymy.

Ýagyp keýpi çaglaýaňmy,
Derdim janyňa batýamy.
Ýa halyma aglaýaňmy,
Ýa ýöne agyň tutýamy?!

***

Ilim, ýüz-müň soraglym,
Ilim ýokdan bar etgen.
Taý münüpsiň, Göroglym,
Ýykyldyňmy Gyratdan.

Çekdiň pelegiň gerdin,
Hiç kes duýmady derdiň,
Säher namaza durduň,
Kylynmadyk täretden.

Zyňyp gadym endigim,
Egne daňyp kündügim,
Bäş wagtyňdan dändigim,
Döndügim keramatdan.

Ýerde ymmatym bardyr,
Gökde niýetim bardyr,
Hemzybanym Alladyr,
Haraý ýokdur ülpetden.

Syrym açar bu zyban,
Duýgularym göz-gülban,
Şükürim köpdür, eý jan,
Kem etmediň birekden.

Hetdim bilmeý joş urdum,
Ne işlere baş urdum,
Sözüm haka tabşyrdym,
Aman diläp nurbatdan.

Şähri BOSSAN.