Ýör gideli...

ÝÖR GIDELI...

Ýör gideli Guşlygaýañ etegne,
Aýlanaly "Ýekedaban" jeññelin.
Gabygny meñzedip hokgañ petegne,
Toraññylar otyr tylla teññeli.

Mesirgän erkege meñzeş däl Murgap,
Bulançak suw dolduranok hanasyn.
Ak jerenler gaçyp atýar usurgap,
Ganhorundan gorap türpe balasyn.

Pürün döken ýylgynlaryñ çybygy
Ýörände dyzyña degýär şapylap.
Howply öñki güzer ýeriñ läbigi,
Ajymtyk ys burna urýar hapylap.

Gaýañ ýüzündäki gadymy gowak
Penalaýar baýguş bilen gyrgyny.
Towşanyñ salparan gulaklarna bak,
Ýaza ýetjek bolup görýär görgüni.

Demir çişe dönüp gitdi syzalar,
Bir günde ýyrtylýar täzeje köwüş.
Gyş pasly,
Gar-a däl, nemem syzanok,
Ýagaýsa nädersiñ bir damja ýagyş?!

Beýle husyt bolar eken tebigat!
Azajyk!
azajyk gyýylýar ýürek.
Gözellik isleýär sabyr-kanagat,
Maksada ýetmäge erjellik gerek!

Alty AKMÄMMEDOW.

# edebiyatwesungat_81