Aý bilen söhbet

AÝ BILEN SÖHBET

Unutma,
Her agşam seni ýatlaýan,
Bialaç ýatlaýan gözel keşbiňi.
Maňa derek bolsaň görüp bilerdiň,
Arzuwlarma ýoda ýasap gelşiňi.

Gije gelip göge seçende patrak,
Bulutlaryň girdabyndan Aý bakýar.
Aşagynda duşuşanmyz ýatladyp,
Ýene-de gulagma çawuşyn çakýar:

— He-eý aşyk, ýene-de geldiňmi seýle?
Näzlerini gözläp şol näzeniniň,
Pelek öwrüminden bolup nägile,
Hem näletläp näletkerde zeminiň,
Saňa atan ýowuz pitjiňlerini,
Synaglarny seň ýoluňy baglaýan...
Bilýän, ýerliksizem däldir-le weli,
Ykbalyňdan sen juda kän nalaýaň.

Durmuşdan ýitiren bagtyňy sorap,
Aýlanýaň şol duşuşylan tünege.
Ýyldyzly asmana nazaryň dikýäň,
Misli garaşýan deý menden kömege.

Hany?! Meň elimden zat barmy gelýän?!
Düşün maňa, durma içiň hümledip.
Ne-hä men bagtyňy gaýtaryp bilýän,
Ne-de bilýän dertli halyň ýeňledip.

Bilýän, saňa agyr gelýär bu günler,
Menden başga düşünmez seň derdiňe.
Biumyt ertirler, armanly düýnler
Şu günlerňi hiç goýanok erkine.

"Hemme zat düzeler" diýip biljek däl,
Ýa biljek däl dertleriňe em edip...
Söygiň ömürbaky galar kalbyňda,
Ýaşaýyşa hyjuwyny kemedip.

Berdimyrat BÄŞIMOW.