Bilmezmiñ

BILMEZMIŇ

Hyýalymda arzuwlanym, islänim,
Ýaňzydamda, kakdyramda, bilmezmiň.
Uludan umydym, niýet, pes pälim,
Özelenip, dik duramda, bilmezmiň.

Hesret çeksem, «Çomak» sokulyp ýörmän,
Aňymdan agtarman, «Yşkymy» dörmän,
Bihabar, öwüşgin özüňde görmän,
Perwana deý, oduramda bilmezmiň.

Göni diýmä bognum ysmaz, gorkaryn,
Gabak galsa, gözleriňden ürkerin,
Gül goýnuňda jennet ysy bark uran,
Ruh takatda, jan aramda, bilmezmiň.

Ölemen aşygyň diňle sözlerim,
Ýylgyraňda, güldüreňde gözleriň,
Daňyp goýduň, saňa bagly çözlerim,
Haraý isläp, garanymda, bilmezmiň.

Gelsene, ýar, gözleşeli göz bilen,
Dert dowalap, muhabbetli söz bilen,
Ýeke bir şert, duýmasyndan özgeleň,
Ätiýaçly, erk soramda, bilmezmiň.

Oýlanyp gör, ýokdur mende ýazyk kän,
Ümsüm ýördüm, seni görüp gyzykýan,
Hoşamaýlap golaý barsam tazykýaň,
Çöke düşüp, ýalbaramda, bilmezmiň.

Almany asmana okladym, gapdym,
Düýşden gorkup, oýanamda hopukdym,
Duýgymy duýdurmaň ugruny tapdym,
Kesbi-kärim saýgaramda, bilmezmiň.

Maýylam aklyňa, aşyk görküňe,
Hiç bir, halda meni goýmaz erkime,
Men bir ýygra, başardanok her kime,
Küýe mahsus, baş çaramda, bilmezmiň.

Tap berenok yşkym, kalbymda möwjän,
Barmy aşygyndan ar alan çöwjän,
Yşarat bermezden oýlan, öňinçän,
Çöşle ýumak, men saramda, bilmezmiň.

Üşütme tutup dur, gel, ýar, mähre çoý,
Anyk ikimize bolmaz nika, toý,
Maksat birdir, iň bolmanda bilip goý,
«Saýlama» sen, her göremde, bilmezmiň.

Ilmämmet, mert durgun, söýensiň, söýgin,
Ymtylýan umydyň, «Şahynda keýgiň»,
Ölseňem, galsaňam, diýmeli, diýgin,
Bahanalap baranymda, bilmezmiň.