ENE DILIM
Göwnüme bolmasa köpelýän ýaly,
Geljegiňe şübhelenýän nadanlar.
Olar aýry ýurtdan gelenler däl-de
Kökün şu toprakdan alan adamlar.
Gabat gelip diýseň, «Salawmaleýkim!»
Soraşyp durmazlar saglyk-amanlyk.
Öz ene dilinde gürläp bilmezlik
Etdigiň dälmidir enä ýamanlyk.
Öz ene dilinde saýrap bilmezlik
Ýüzüň öwürmegiň dälmi ataňdan?
Başga agyr jeza oýlap biljek däl,
Eý, adam, sen bu goýberen hataňdan.
Howsala düşýärin, eý ene dilim,
Ynan sen ogluňa, sözüm däl galat.
Sen meniň mertebäm, şu günüm, ertäm,
Senden jyda düşjek günüme nälet!
▶ KIRŞI ÜZÜLENDE ŞABRAM DUTARYŇ
Düýn meýlis gurap, şerap başynda,
Jyňňyrdadyp, tost göteren çaglarym,
Bu gün bir dostumyň ýeri boşap dur,
Saýrak bilbilidi erem baglaryň.
Düýn bir gojanyň söhbetin diňläp,
Gadymýete başym uran çaglarym.
Bu gün şol gojanyň ýeri boşap dur,
Şir-peleňi ol awlakly daglaryň.
Düýn gözlerinden ogşap bir gyzyň
Çeşmäniň boýunda sermest çaglarym.
Bu gün hijran ody ýanýar arada,
Aýralyga ýüregimi daglaryn.
Düýn tapanymy ýitirip bu gün,
Gijeler gözümden ýaş döküp ýörün.
Soňlanmadyk mukam ýadyma düşýär,
Kiriş üzülende şabram dutaryň.
