Mundan soňra ençe ýyllar geçipdir,
Asyrlar külterläp, nurun seçipdir.
Bir gün günler aýa basanda gadam,
Jedel edenmişin kagyzdyr galam.
Hersi özün öwüp, galdyryp arşa,
Öwgi serhedinden geçenmiş aşa.
Gyzyşýan jedeliň sebäbi belli:
,,Haýsymyz Dünýäde wajyp, gerekli?!''
Diýip, bir-birege teselli berip,
Başlanmyşyn hersi özüni öwüp.
Özi barasynda bir-iki agyz
Öwgüli sözüne başlanmyş kagyz.
Diýipdir: ,,Owaldan aslymyz merdem,
Aslymyz ýaprakdan, daşdan, deriden.
Ynsan bir bölejik ak kagyz üçin
Işlänmişin gündiz edip gijesin.
Biz göýä hasylly, zerur mes toprak,
A topraksyz miwe bolmaýar, akmak!
Deňeşme meň bilen, derejäňde dur,
Çünki men bu dünýä senden has zerur!''
Diýip, kagyz sözün gutaranynda,
Galam tarsa galanmyş ör boýuna.
,, Kimmişiň sen zerur bolarça menden,
Ulumsy, naýynsap, dereksiz gende!
Hälden gulak etim guratdy gohuň,
Sen mes toprak bolsaň, men- jomart tohum.
Mes toprak gözüňe eziz görünýär,
Emma miwe welin tohumdan önýär.
Şü dünýäde galam bolmasa eger,
Kime gerek seniň ýaly takyr ýer?!
Saňa maslahatym, diňle-de meni,
Meň bilen deňeşme, tap öz deňiňi!''
Diýip, galam sözün gutaran çagy,
Çar ýana ýaýranmyş jedeliň ýaňy.
Ine, şol jedelli günlerden başlap,
Bir saý sebäp bilen ýazylmanmyş hat.
Kagyz ýatypmyşyn bir çetde galňap,
Hiç zada ýaraman, könelip, çaňlap.
Galam hem bir çetde ýatypmyş iňläp,
Garawsyz, dereksiz bir çöpe meňzäp.
Kagyz bilen galam şol dem, şol sagat
Düşünenmişinler bir zada magat:
Näçe gyt bolsa-da kagyzdyr galam,
Dünýäde wajyp zat adamdyr-adam.
01.10.2017
