Özbegistan täsirleri

ÖZBEGISTAN TÄSIRLERI

▶ AK ÝOLLARDAN ÖÑE BARÝAR ARKADAG

Türkmen, özbek halky, şäherdir kentler,
Goñşy hem dost ýaşap asyrlarboýy.
Bir-birege goldaw, medet beripdir,
Bile sowup her bir baýramy-toýy.

Birdir iki halkyñ däbi-adaty,
Taryh çuñlugyna uzan kökleri.
Parahat asmanda ýaýyp ganaty,
Dostlugy jar edýär akja kepderi.

Goşulyp mylaýym öwsen ýellere,
Gündogar sazlary ýañlanan wagty,
Jañly kerwen geçen ýüpek ýollara,
Ýene saýa salýar dostluk daragty.

Depregiñ, tüýdügiñ, kernaý, surnaýyñ
Eşdilýän ýerinde şirin owazy,
Toý tutulýar.
Mähelle tans oýnaýar,
Kalba dolýar söýgiñ, bagtyñ howasy.

Diñine bak, hol, gadymy binalañ,
Ýetýär belent başy Arşyñ deñine.
Gündogar, men seni nämä deñäýin,
Ýokdur gözellikde geçen öñüñe.

Mary, Ürgenç, Was hem Buhara, Hywa,
Ata-babalaryñ gezen ýerleri.
Sen mydam laýyksyñ tarypa, öwgä,
Nijeleriñ sežde kylan ýerleri.

Meñzeş sen dünýäniñ göwher-dürüne,
Gadymy Gündogar,
Gözel Gündogar!
Altyn Aý nur saçar sähra-düzüñe,
Alnyñdan hemişe seniñ Gün dogar.

Bir derýanyñ kenarynda öý guran,
Gündogaryñ iki gadymy halky ~
Içen suwy birdir türkmen, özbegiñ,
Bir-bire mähremdir häsiýet-hulky.

Äleme bellidir paýhas-pähimde,
Alyşir Nowaýy, Magtymgulysy.
Baý bu ýerler akyldara, zehine,
Bir supra jem eýlän ili-ulusy.

Bu gün Türkmenistan hem Özbegistan,
Bir-birege gol uzadýar dost bolup.
Arkadag paýhasy - dillere dessan,
Arkadagyñ ýoly - dünýä nusgalyk.

Çirimsiz ak gijeleriñ hakyna,
Halk üçin işleýär, döredýär, gurýar.
Kireñsiz ak gündizleriñ hakyna,
Arkadag ak ýoldan ynamly barýar.

Sebitde däl,
Tutuş dünýä ýüzünde
Parahatlyk bolsun diýip berkarar.
Ýagşy niýetleri besläp köñülde,
Ak ýollardan öñe barýar Arkadag.

Mert
           Watana howa ýaly gerekdir,
Mert - Zeminiñ arzuwlany, geregi.
Goralmaly,
Aýalmaly ýürekdir
Arkadagyñ dünýä ýaly ýüregi.

Ol ýürege älem-jahan ýerleşen,
Aladasy - adamzadyñ geljegi:
Didarlaşyñ, doganlaşyñ, birleşiñ,
Aman bolsun zeminiñ çar künjegi.

Bilelikde Beýannama gol çekip,
Dostana döwletleñ milli Lideri.
Köñüllere mizemejek ýol çekip,
Döretdiler ýüreklerde jenneti.

Serpaý edip bize günleñ ýagşysyn,
Ýaýdy giñ jahana parahatlygy.
Arkadag ýaşasyn,
Watan ýaşasyn,
Ýaşasyn türkmen hem özbek dostlugy!

▶ DOSTLUK DARAGTY

Agzybirlik daragtynyñ miwesi,
Ýaşasyn türkmen hem özbek dostlugy.
Beýik Galkynyşly zamanañ sesi,
Ýaşasyn türkmen hem özbek dostlugy.

Asyrlar, heññamlar bolandyr şaýat,
Bir-birege arka, baky hemaýat,
Asly beýik, topragy nur-keramat,
Ýaşasyn türkmen hem özbek dostlugy.

Magtymguly Pyragy hem Nowaýy,
Birdir iki halkyñ gökde Gün, Aýy,
Saz-söhbeti şirin, sözi ~ dogaýy,
Ýaşasyn türkmen hem özbek dostlugy.

Köneürgenç, Was hem Hywa, Buhara,
Kerwen çekip Maru-Şahu-Jahana,
Halklar gadam goýdy gadym Ahala,
Ýaşasyn türkmen hem özbek dostlugy.

Ýakyndyr dilimiz, dessur-däbimiz,
Mydam ýagşylykda niýet-pälimiz,
Bir suprada toý toýlaýar ilimiz,
Ýaşasyn türkmen hem özbek dostlugy.

Sag bolsun mähriban Arkadagymyz,
Göterdi belende şöhrat-şanymyz,
Birdir ykbalymyz, jiger-janymyz,
Ýaşasyn türkmen hem özbek dostlugy.