Diýýärler

DIÝÝÄRLER

Diýýärler: «Nobat jan aýdym aýdanda,
Hemmäň depe saçy üýşibirmişin.
Aýdym-saza «häki birzat» öýdeň-de
Onuň golaýyna süýşibirmişin.

Diýýärler: «Wasp etse türkmen Güllerin,
Ýaşdan dolup duran gözler durlanar.
Heniz geçip gutarmanka ýollaryn,
Düşermişin uçup barýan durnalar».

Diýýärler: «Zaryna gulak gerende,
Doň ýürek gyzlaram gözlärmiş ýaryn.
Gaýnap duran owazyny görende,
Bagşyjyklar ýakarmyşyn dutaryn».

Ýene-de ol hakda kän zat diýýärler.
Gepem, şol sözleriň haklygyndadyr.
...Bu gün menem arsyz bagşy saýýarlar,
Belki, Nobat bagşyn ýoklugyndadyr?

Italmaz NURYÝEW.