Düýş

DÜÝŞ

Özgeripdir ynsançylyk gymmaty
Garaýşym bu döwre dälmiş kybapdaş.
Durmalymyş owurdyñda ynsabyñ,
Damagyñdan öter ýaly tagam-aş.

Özge betbagtlygna biperwaýlygy
Delil tapyp zulumkeşi aklanyñ
Gözýetimi nusgasymy, çelgisi
Zaman bilen deñje ädim ätläniñ?

Wyždanyñy nätjek? Hakykat hany?
"Hakykaty gözlän ýuwudar ony
O-da tegek bolup bokurdagyna
Ne-hä añry gider, ne gaýdar bäri"

Gürleşýärdi zalym görkezmän özün
Hem berjek bolýardy eldäki közün.
Soñky ahwalata kesilýär sözüm,
Görenlerme ynanmaýar öz gözüm.

Epýän diýip hakyñ öñünde dyzyn,
Görýän dört aýagna düşýänin kazyñ.
Gyşa öwrüp günäsizleriñ ýazyn
It bolup oýnaýar üstünde garyñ.

Biparhlykdan heñläp giden sudurlar,
Bu ýagdaýa garap dur kada ýaly.
Ne-hä öli, ne-de bir diri bular
Adamzada şowsuz meñzetme ýaly.

Pişejigin jüpläp süýşürägede,
Öýsüz galan çaga göterdi golun...
Şol wagt horaz çalyp dañdanyñ sazyn
Oýardy. Görmedim yzyn.
Oýandym köp şükür görmedim yzyn.

***

Kazylyk edeniñ ynsan ogluna,
Kazysy hut Biribaryñ özüdir.
Tarapgöý çözgüdi baky öýüne
Elin eltjek ot beriji közüdir.

O.Bäşimowa.