Sansyz belaga

SANSYZ BELAGA

Köñlümni berdim bir biwepaga,
Köýdi ýüregim jebri-jepaga.

Eý näzeninim, maña rehim kyl,
Galdym sen diýip sansyz belaga.

Bimary-yşkyñ boldum neter men,
Ne çäre eýleý jebri-jepaga.

Peýkamyñ oky degdi ýürege,
Barmy dogalar uşbu ýaraga?

Dünýede çekdim men ahy-zary,
Sabyr kylawer uşbu jepaga.

Zalym rakyplar bigäne kyldy,
Eýle terahhum men binowaga.

Andalyp sen diýip geçer janyndan,
Kylgyl enaýat müflis gedaga.

Nurmuhammet ANDALYP.