Kit süñkleri

Kit süñkleri

Kit süñkleri çagşap ýatyr kenarda
Ak-ak oñurgalar ala dagmydy?
Niçe müñ ton süñkler ýuwdan kitleriñ
Öz süñküni elläp gören barmydy?

...Läheñler gozgansa, umman çaýkanyp,
Okean yranyp, tapynýar dowul.
Polatdan guýlan gunt deý gämiler,
Kit gelýär! Hany, heý, öñünden sowul!

...Ynsanlary ynsan döräli bäri,
Jandarlary jandar döräli bäri,
Gämileri gämi döräli bäri,
Iñ täze tankeri hem gadym saly
Kitler ýuwudýar käte çöp ýuwdan ýaly.

Ýöne welin göwrümi giñ okean,
Ýöne welin öwrümi giñ okean,
Çaýkanyp-çaýkanyp şondan ikiýan,
Ysnat etse beren ene süýdüne -
Öz goýnundan ýetişdiren kitinem
Gojaman tolkunna dolýar-da bir gün,
Çyrpynyp heýjana gelýär-de bir gün,
Başdan aýlap, honda zyñyp goýberýär!

...Kit süñkleri ýatyr... Alysdan bolsa
Dürbi tutup geçip barýar dargalar.
Ýatyr kit süñkleri. Dag ýatan ýaly,
Oñurgasyn çokup otyr gargalar!...

Sahalin, 1970

Annaberdi Agabaýew