AZAN HEM TÜPEÑ
Bu şäher azanyñ sesine örýär,
Ýene uka gidýär dili dogaly.
...Metjide bukulyp, tüpeñ atylýar,
Humara goýulýar adam ykbaly.
Ýumşak mele saçly, naw ýaly ýigit,
Dälijesi eken ýigrim bäş ýaşyñ.
Bigaýratlyk bolup giripdir gülle
Mañlaýdan,
birigýän ýerinden gaşyñ.
Ol görmegeý gelnin goýup gaýdypdyr,
Açmaga şor mañlaýlaryñ
mañlaýyn.
Şum takdyr dek gara-gara daşlaryñ,
Ýagşylyga ýazmak üçin täleýin.
Bürgüt bolup parlap uçup barýarka,
Towuk kimin gaty busupdyr atan.
Şeýdip, gadymlardan oka tutýandyr
Mert ýigidi -
ilsiz-günsüz biwatan.
Azan sesi gelýär,
tüpeñ atylýar,
Bu zatlara eltdi takdyrym meni.
Ölüm, bir gün bize tarap ýol salsañ,
Bürgüt uçuşynda kaklagyn meni!
Baýram JÜTDIÝEW.
