Düýş

DÜÝŞ

Ölüler, diriler girdi düýşüme,
Gatyşdy barysy, dürüşde boldy.
Gaýmalaşyp, goşuldylar işime,
Kimseleriñ gözi şer işde boldy.

Ynsaby-ygrary arka atdylar,
Haky töhmet kökenine çatdylar,
Garşy duranlary alyp ýatdylar,
Ibagärlik köpe serişde boldy.

Kime bil baglajak? Kime ynanjak?
Ýene il aglajak. Ýene il ýanjak.
Kiseleri doly. Ýüzleri hanjak?
Durman, nebis üçin ýörişde boldy.

Gözümi baglady garym-gatymlyk,
Bilmen, menzilim bar näçe ýatymlyk,
Gedaý galyp, çaý diledim atymlyk,
Ölmek başartmady, ser düýşde boldy.

Bäbegiñ syrty dek ýüzi tep-terler,
Belläp durlar, ele alyp depderler,
Özlerini sanyp akja kepderiler,
Daşyndan görene perişde boldy.

1991 ý.

Ýagmyr PIRGULYÝEW.