YLHAM
Kän garaşdym, ylham, galamym oýnap,
Elim bulap, heý çagyrsam, gelmezmiň?
Özimi horladym, zehinim gynap,
Gapym açyp, garap dursam gelmezmiň?
Bilim guşap, çola jaýy terk etsem,
Ile çyksam, galamyma erk etsem,
Hakykaty setirlerime görk etsem,
Toslamadan ýüz öwürsem, gelmezmiň?
Çopan bolsam, çoluk bolsam gumda men,
Jöwza bolsun, aňzak bolsun, günde men,
Aý aýdyňda, aýsyz gije, tümde men,
Şöwür çekip, dowar sürsem, gelmezmiň?
Ussanyň kärine bolaýyn bende!
Guralyň ýagşysy-palta hem rende.
Ýonuşgaň hoş ysy burna uranda,
Serhoş bolup, hezlin gorsem, gelmezmiň?
Tebigatdan jana lezzet, em alsam,
Tenekar dek howasyndan dem alsam,
Jadylaýjy mukamlarna diň salsam,
Içgin-içgin söhbet gursam, gelmezmiň?
Ýagmyr PIRGULYÝEW.
0
