Görmäge geldim

GÖRMÄGE GELDIM

Maý tapdym-da sypara,
Obam, görmäge geldim.
Jana aram tapara,
Diýar, görmäge geldim.

Soňky döwür bilsediň,
Irdenki azan sesiň,
Diňlemäni küýsedim,
Diýar, görmäge geldim.

Synaňa ýapyşaýyn,
Gaýaňa dyrmaşaýyn.
Kemerlerden aşaýyn,
Diýar, görmäge geldim.

Derelerde otlaýan,
Dowarlary ýatlaýan.
Sensiz karar tapmaýan,
Diýar, görmäge geldim.

Gözbaşyňda daýansam,
Derman suwuňdan gansam.
Barlygyňa guwansam,
Diýar, görmäge geldim.

Pederimiň mesgeni,
Ýylat kalby, jan-teni.
Ah, eziz görýän seni,
Obam, görmäge geldim.

2007 ý.