"Göýä, bir azaşan gämi..."

"GÖÝÄ, BIR AZAŞAN GÄMI..."

Göýä, bir azaşan gämi,
Jahanda ýok belli ugrum.
Bu hem hiç,
Ýöne göwrämi
Ýok etmekçi bolýar ruhum.

Ol diýýär: “Saňa dynçlyk ýok,
Baş goşduň peýdasyz işe.
Seni öňe äkidýän ýol
Hiç haçan gowşurmaz ile.

Seni söýüp idäp gelen
Soň galmak islär ganyňa.
Owal-ahyr şatlyk bilen
Dolanmarsyň mekanyňa.

Özgäniň çekýän ezýeti
Saňa ötere ýol bermez.
Dünýäniň aýşy
-eşreti
Gamgyn köňlüňi bejermez.

Özüňe tapmarsyň orun
Gämisinde goja Nuhuň...”
Şu zatlary aýdyp her gün
Maňa azar berýär ruhum.

Orazgylyç ÇARYÝEW.