Gybat

GYBAT

Şäherdäki doganlama gaýdypdym,
Gabat geldi birden obadaş Oraz.
Diýende "ugruň ýok", diýipdim menem,
- Aý, ýöne, aýagym agyrýar biraz.

Iki hepde ýene oba dolandym,
Bir geňsi dikanlap bakýarlar maňa.
Başlyk ýoldan çykyp ilki ýüzlendi:
- Hallaryň neneňsi aýakdan ýaňa?

Soňra obadaşlar Bahardyr Parça,
Diýdiler: - Abatmy çykan aýagyň?
Gaşlaryn çytdy-da Mamajan daýza:
- Haý, ýegen, iýipsiň şäher taýagyn!

-Oglumjan bolarsyň görmedik ýaly.
Diýeni ýaňydy Mähriban eje.
Şo  bada baldyzy: -Ýasama aýak
bolarmy öňki deý heý-de gelneje!

Goňşym diýdi: - Gutulduňmy bireýýäm,
Aýagyň döwülip  ýatypsyň aýlap.
Hälem, Alla şükür, gybatçylarmyz,
Diňe soňky ýola eltmändir jaýlap.

Ahmet ARAZOW.