Mert kişiniñ öwüdi

MERT KIŞINIÑ ÖWÜDI

Ýalňyşmaýan adam bolmaz, elbetde,
Ýogsa seni terk edibem giderdim.
Şöhlesi gyýtajyk, peltesi ketde,
Namardyň ýanyna nämüçin bardyň.

Zelil göwnüň ter dälmidi ýuwadan,
Şeýle agyrmydy çekmeli derdiň.
Seniň ýüzüň asman ýaly owadan,
Namardyň ýanyna nämüçin bardyň.

Bir gat hamy ýanyp gitse ýüzüňden,
Ony gabyk ýaly bolmaýar ardyp.
Özüň çykan ahyr türkmen düzünden,
Namardyň ýanyna nämüçin bardyň.

Indi bu iş seniň boýnuňda galdy,
Bolup daglar bilen asmana karzyň.
Güller özünden öň solmaly däldir,
Namardyň ýanyna nämüçin bardyň.

Bolar rüstem wagtyň, bolar hor wagtyň,
Ýöne göwün gabsaň durmasyn ýarsyp.
Bu dünýede mert kişileň bar wagty,
Namardyň ýanyna nämüçin bardyň.

Mämmetnazar BABANAZAROW.