Eje

EJE

(Gülöwser atly gelniň haýyşy bilen)

“Gün hem sen diýip dogýar”...
Daşyň galasy menem.
Sen bolmasaň ýanymda,
Neneň ýaşaýyn enem?!

Agyr durmuş hupbady,
Datdyň niçe şapbady,
Etmediň dat-bidady,
Sözleri dürden, eje.

Aýazlarda köz bolduň,
Tomus bolduň, ýaz bolduň.
Nusga aldym, özgerdim,
Tapdym men ýardam, eje.

Salym sen, küregim sen,
Ýalňyz täk geregim sen.
Kalbymda ýüregim sen,
Mähek daş - merdem, eje.

Gelse gelsin seneler,
Garramasyn eneler.
Aýa, Güne deňeler,
Şöhlesi nurdan eje.

Misli bir ab-u-köwser,
Behişt şemaly öwser,
Aýdar gyzyň Gülöwser,
Orunyň törden, eje.

Sen ene, men perzendiň,
Gulagymda her pendiň.
Ýadygär galsyn bendim,
Her harpy zerden, eje.

Dowamatdyr agtygyň,
Şolar dünýäde bagtyň.
Synmasyn täji-tagtyň,
Ýatda sen her dem, eje.

Daş bolaly perýatdan,
Hoş bolaly zürýatdan.
Alkyşyň gatbar-gatdan,
Geçeli serden, eje.

Seň baryňda hoş menem,
Aýakda däl, baş menem.
Gam-gussadan daş menem,
Ýaşa sen, merdem, eje.

08.07.2024.