Moda hakynda

MODA HAKYNDA

Başymda bagana gulakçynym bar,
Egnimde paltom bar - biçimi sada.
Geñirgenip, öwran-öwran änedip,
Gapdalymdan geçdi iki pyýada.

Gatnawly köçeden bir gözel barýar,
Ketenisi syratyna gelşip dur.
Hol beýlede duran iki gyz weli,
Göz ümleşip oña bakyp gülşüp dur.

Ilkibada añka-tañka bolsamam,
Bahym düşündim men bu bolýan zada:
Diýdiler: bagana gulakçyn bilen
Keteni bireýýäm könelen moda.

Işe welsepitli gatnamak geñmiş,
Ýa-ha maşynly git, ýa-da pyýada.
Belli işiñ başyn çatsak-çatmasak,
Işeññir görünjek bolmagam - moda.

Bir tanşym bar ýüzüniñ çyrşagyn görmän,
Özgä at dakmagy edindi kada.
Bir seretsem, asyl ýañkyñ öýünde
Onuñ by häsýeti bolupdyr moda.

Agzyna gelenin sarnap, sygyryp
Bögürip dur bir aýdymçy pyýada.
Bögürse bögürsin, indi toýlara
Hut şony çagyrmak modamyş, moda.

Salam berenimde şol salamymy
Alman geçýäni-de görüp nega-da:
Içimden diýýärin: "Nätseñ, et weli,
Adamlykdan berin aýyrma, moda!"

* * *

Elbetde, biz her bir erkek kişiden
Göroglynyñ çykmajagyn bilýäris.
Bilýän bolsañ, oturber-dä diýsene...
Ýok, gaýtam delilem tapjak bolýarys.

Erkek kişiligiñ, goç ýigitligiñ
Hamana üýtgänmiş gadymy şerti.
...Dört ýigit öwünýär palaw başynda
Sypalap künji ýag çalynan murty.

Gürrüñ gaýrat hakda, namys hakda däl,
Elbetde, ýylmanak gelinler hakda.
Aýlamaga şol gelinleñ başyny
Bular bir-birinden bolarly ökde.

Ärler mydam güýçli bilen göreşip
Göz görkezip, onsoñ dile düşüpdir.
Döşe kakýan bolsak, aýal azdyryp,
Indi är bolmagam ýeñilleşipdir.

Berdinazar HUDAÝNAZAROW.

Surat: Ýe.Gorohowa / "Крокодил" žurnaly, 16.06.1976 ý.