Bähbit

BÄHBIT

Irkiräk döwürde goñşy obada,
Bähbit atly täsin bir adam bardy.
Durmuşdaky bolýan ahwalatlaryñ
Ählijesin ýagşylyga ýorýardy.

Mysal üçin, ýatyp turýañ - keýpiñ ýok.
Sebäbi, düýşüñde kesellänmişiñ.
Bähbit aýdar: düýş tersine ýorulýar,
Enşalla dert görmez bu gara başyñ.

Howur salgymlanyp töweregiñde
Dünýe eräýjege meñzäp durandyr.
- Gyşam gyşa meñzär enşalla - diýip
Bähbit muny ýagşylyga ýorandyr.

Näçe gündür, ýelden gözüñ açylman
Gözýetimi ümez baglap durandyr.
- Ýagjak ýagşyñ alamaty bi - diýip
Bähbit eýýäm ýagşylyga ýorandyr.

Obada bir bendäñ kazasy dolup,
Hossarlary gözýaş edip durandyr.
- Gowy adam anna güni gidýändir
Diýip... onam ýagşylyga ýorýandyr.

Ýeñil ýorgut bilen gaýgy-gussany
Edip bilmejegiñ elbetde, belli.
Ýöne welin her niçikdir o sözler
Birazajyk tesellidi, teselli.

Diýýänine özi ynandymykan
Diýip nämä gerek müñkürlik etmek?
Hernä nesip etsin hemmämize-de
Ynanyp ýaşamak,
Ynanyp gitmek.

Berdinazar HUDAÝNAZAROW.