Halkym

HALKYM

Täleýiñ ters gelip nije asyrlar,
Saldy köñülleri lerzana, halkym.
Indi ýaşyl tuguñ baky pasyrdar,
Meniñ azat halkym, erkana halkym.

Jomart sen myhmana geleñde lezzet,
Atañdanam artyk edýärsiñ hezzet,
Diñe gowy zatdan alýarsyñ lezzet,
Imana ýakynsyñ, türkana halkym.

Beýik añryñ bardyr baksañ yzyña,
Halal lebziñ geçýär ogul-gyzyña,
Mertlik-artyk agram salmak özüñe,
Şondan diliñ uzyn, merdana halkym.

Dürli-dürli keramatlar sanalar,
Iñ mukaddes orny bizde nan alar,
Sende kändir guýmagursak danalar,
Her sözi almaz dek dürdäne halkym.

Altyndan arassa, polatdan berksiñ,
Asylly türkmensiñ, dünýäme görksüñ,
Kynçylykdan açgöz namartlar gorksun,
Men juda ynanýan ertäñe, halkym.

Haýyr işde başda durýan serwer sen,
Namysyñy hiç bir zada bermer sen,
Megerem, misilsiz ynsanperwer sen,
Dostluk paýlap ýörsüñ dünýäme, halkym.

Çyn söýgim - ogully jogabym bolar,
Seni wasp etmeklik sogabym bolar,
"Sen bizden däl!" diýmek jogabym bolar,
Saña agzalalyk ündäne, halkym.

Hažyk-hužuk eýlese-de päksiräp,
Garaşlylyk derdi, goý, gitsin yrak,
Seniñ ogluñ - men Italmaz Akmyrat,
Getirdiñ kalbymy heýjana, halkym.

Italmaz AKMYRADOW.

"Watan" gazeti, 1995 ý.