Rysgal

Berdinazar HUDAÝNAZAROW

▶ RYSGAL

Artyk göräýmesem az-a göremok,
Bu dünýäniñ maña beren paýyny.
Özüm bileb getirmändim ahyry
Iýjek nanymdyr-u içjek çaýymy.

Durmuş bolsa şu zatlardan başlanýar,
Şuny-da biz ýatlaýarys her demde:
Günüñ reñkin soran bugdaýyñ başy
Bu Dünýäni göterip dur gerdende.

Yzda galdy agaç asyr, daş asyr...
Adam ýyldyrymdan ýasandy ganat.
Ýyldyrymyñ ýelgininden bat alyp,
Biz şahyrlar guwduradyk kä halat.

Bajakly meýdanlar ilmedi göze,
Ýöntemräk göründi derçirän daýhan.
Ýöne şindem şu meýdandan önýärdi
Ýüzüme syldygym mele-myssyk nan.

Säherler başlanýar aýdym-saz bilen
Dañdan başym galdyrmankam ýassykdan,
Kemlikden-ä zeýrenmäge hakym ýok,
Ýöne gäbim azaýmasa meslikden.

Takdyr ýola düşen tigirçek ýaly
Ýyndamlandy baharymyz, gyşymyz,
Hernä, bu döwletden, beýle bagtdan
Aýlanmasyn bu amanat başymyz.

Şeýle zamanda ýaşap ýörüs biz:
Tapylýar bir zady küýsese ýürek.
Rysgalymyz ýetik. Ýöne şu zady
Götermäge, dostlar, injigem gerek.